Feb 08, 2017 02:45 pm
views : 941
Location : Muhammad Ali Society
Karachi- Chairman PTI Imran Khan Press Conference
کراچی ، کبھی نہیں سنا کہ آدھے موٹر وے کا افتتاح ہوا ہو، عمران خان
چیئرمین پاکستان تحریک انصاف عمران خان نے کراچی میں پریس کانفرنس کے دوران
کہا کہ پاناما کیس کے بعد ہر چیف ایگزیکٹو کرپشن سے خوفزدہ رہے گا،عدالت
میں جو حقائق سامنے آرہے ہیں اسی سے پاکستان تبدیل ہوگا،امید ہے پیر سے
سپریم کورٹ دوبارہ سماعت کرے گی۔ پاناما کیس میرا نہیں ، 20کروڑ پاکستانیوں
کا کیس ہے ، اقتدار میں آکر ذات کو فائدہ پہنچانے والوں کو خوف ہوگا۔
کراچی میں گندگی کے ڈھیر پہلے نہیں ہوا کرتے تھے، کراچی ایسا نہیں تھا جیسا
آج ہے ، یہ روشنیوں کا شہر تھا۔کراچی کے مسائل کی وجہ بھی کرپشن ہے۔
تبدیلی کیلئے کرپٹ اشرافیہ کو سزا دینا ہوگی ،ایسی نیب کو 100سال بھی
چلائیں تو کرپشن بڑھے گی۔ کراچی میں40 فیصد لوگ سیوریج سے ملا پانی پیتے
ہیں ، ہمارے بچے منرل واٹر پیتے ہیں ، عام آدمی کتنا متاثر ہورہاہے۔کراچی
میں لوگوں کو جان کر نادرا کارڈ نہیں دیے جارہے۔یہ بنگالی ، پختون اور
مہاجروں سمیت سب کا حق ہے ، نادرا کارڈ نہ ملا تو لوگ ووٹ نہیں دے سکیں گے۔
چیئرمین پاکستان تحریک انصاف عمران خان کا کہنا تھا کہ قطر کے سفیر نے
کہاہے کہ ان کا قطری شہزادے کے خط سے تعلق نہیں، قطری حکومت جانتی ہے کہ ان
کی بدنامی ہورہی ہے۔ن لیگ کہتی ہے نجی معاملہ ہے تو وزرا سپریم کورٹ کیوں
آتے ہیں ، لوگوں کو سب پتہ ہے کہ قطری خط فراڈ ہے۔شریف خاندان کا اصل منی
ٹریل وہ ہے جو اسحاق ڈار نے تحریری اعتراف کیا۔
چیئرمین پاکستان تحریک انصاف عمران خان نیکہا کہ زندگی میں کبھی نہیں سنا
کہ آدھے موٹر وے کا افتتاح ہوا ہو،جب سے پاناما آیا نواز شریف صرف فیتے کاٹ
رہے ہیں۔
چیئرمین پاکستان تحریک انصاف عمران خان نے کہا کہ محمد زبیر کو وزیر اعظم
کا دفاع کرنے کے صلے میں گورنر سندھ کا عہدہ ملا، اسد عمر یہاں موجود ہیں
اس لئے محمد زبیر کے بارے میں سخت بات نہیں کروں گا۔
چیئرمین پاکستان تحریک انصاف عمران خان نے کہا کہ رانا ثنااللہ اور سعد
رفیق عدالت کو دھمکیاں دے رہے ہیں ، ن لیگ میں زیادہ تر لوگ نواز شریف کی
کرپشن سے فائدہ اٹھا رہے ہیں ، 60 فیصد فنڈ پنجا ب کا فنڈ لاہور پر لگادیا
گیا۔
چیئرمین پاکستان تحریک انصاف عمران خان نے مزید کہا کہ 90ارب لگانے کے بعد
بھی لاڑکانہ سے بہتر موئن جو داڑو لگتا ہے ،سندھ کا کوئی والی و وارث نہیں ،
پہلے الطاف حسین ڈان بنے ہوئے تھے ،آصف زرداری نہ واپس آتے ہیں نہ دلچسپی
لیتے ہیں ، جن کے پاس ملک کی ذمہ داریاں ہیں ان کا سب کچھ باہر لگا ہواہے۔