اسلام آباد،پاکستان ایشیاء کا مرکز بننے کی صلاحیت رکھتا ہے: وزیراعظم محمد نواز شریف
وزیراعظم محمد نواز شریف نے کہا ہے کہ اپنے جغرافیائی محل وقوع کے باعث
پاکستان ایشیاء کا توانائی ، تجارت اور ٹرانسپورٹ کا مرکز بننے کی صلاحیت
رکھتا ہے ۔پاکستان کی ساٹھ فیصد آبادی نوجوانوں پر مشتمل ہے ۔
اسلام آباد میں نیدر لینڈز کی کمپنی رائل فرائز لینڈ کیمپینا کے چیف
ایگزیکٹو آفیسر رالف جوسٹن سے گفتگو کرتے ہوئے وزیراعظم نواز شر یف نے
کہا کہ پاکستان نے حال ہی میں کسانوں کو کھاد پر دی جانے والی سبسڈی کی مدت
میں توسیع کی ہے ۔ انہوں نے کہا کہ عالمی مسابقتی چیلنجز اور غیر ملکی
سرمایہ کاری کے فروغ کیلئے حکومت نے خصوصی اقتصادی زونز کیلئے قوانین بنائے
ہیں ۔
وزیراعظم نواز شر یف نے کہا کہ حکومت انفراسٹرکچر ، توانائی اور مواصلات
کے منصوبوں پر کام کر رہی ہے تاکہ مختلف شعبوں میں تجارت اور سرمایہ کاری
کو فروغ ملے ۔ وزیراعظم نے کہا کہ ہم خوش قسمت ہیں کہ قدرت نے ہمیں چار
موسموں سے نوازا ہے ۔ سازگار ماحول اور مربوط نہری نظام کے ساتھ ہماری زمین
قدرتی وسائل سے مالا مال ہے ۔
وزیراعظم نواز شر یف نے کہا کہ سرمایہ کاروں کے اعتماد میں اضافے کیلئے
حکومت اقتصادی اصلاحات پرتوجہ دے رہی ہے ۔ اقتصادی اشاریے مثبت ہیں جس کا
اعتراف عالمی ادارے بھی کر رہے ہیں ۔
نیدر لینڈز کی کمپنی رائل فرائز لینڈ کیمپینا کے چیف ایگزیکٹو آفیسر رالف
جوسٹن نے کہا کہ وسط ایشیاء کی اہمیت کے باعث ہم پاکستان میں سرمایہ کاری
کر رہے ہیں ۔ پاکستان میں سرمایہ کاری کے مواقعوں کا ذکر کرتے ہوئے رالف
جوسٹن نے کہا کہ ڈیری کے شعبے میں پاکستان میں بڑی تبدیلی آئی ہے ۔ اب لوگ
کھلے دودھ کی بجائے پیکٹ کے دودھ کے استعمال کی طرف راغب ہو رہے ہیں ۔
نیدر لینڈز کی کمپنی رائل فرائز لینڈ کیمپینا کے چیف ایگزیکٹو آفیسر رالف
جوسٹن نے کہا کہ پاکستان میں متوسط طبقے کی آمدنی اور شہری آبادیوں میں
اضافہ ہو رہا ہے ۔ہم سمجھتے ہیں بڑھتی ہوئی طلب کو پورا کرنے کیلئے معیاری
ڈیری مصنوعات فراہم کرنے کی ضرورت ہے ۔
نیدر لینڈز کی کمپنی رائل فرائز لینڈ کیمپینا کے چیف ایگزیکٹو آفیسر رالف
جوسٹن نے کہا کہ ہم پاکستان کو آئندہ چند سال میں ڈیری مصنوعات برآمد
کرنے والاملک بنانا چاہتے ہیں ۔توانائی ، بنیادی ڈھانچے اور سلامتی کی
صورتحال میں بہتری کی وجہ سے پاکستان سرمایہ کاروں کیلئے پرکشش ملک بن گیا
ہے ۔ ہم آئندہ چند سال میں پاکستان میں دس کروڑ ڈالر کی مزید سرمایہ کاری
کرنے کا ارادہ رکھتے ہیں ۔