Jun 15, 2021 04:07 pm
views : 277
Location : Domestic Place
Karachi: MQM Pakistan has announced to postpone the protest rally
کراچی،ایم کیو ایم پاکستان نے احتجاجی ریلی ملتوی کرنے کا اعلان کردیا، عامر خان کہتے ہیں نئے لے پالک سندھو دیش کے حامیوں کو آگے کرکے خوفزدہ نہیں کرایا جاسکتا، ہم نے چوڑیاں نہیں پہن رکھیں
متحدہ قومی موومنٹ پاکستان کے رہنماء عامر خان نے کہا ہے کہ سندھ حکومت کے ایک ذمہ دار نے ایم کیو ایم پر کافی الزامات لگائے جس میں ایک سازش کی بو نظر آتی ہے، ان کی گفتگو نے ان کی خواہش کو بے نقاب کردیا ہے اور ہم ایسی کسی سازش کو ہرگز کامیاب نہیں ہونے دیں گے کہ جس کے نتیجے میں شہر میں خدانخواستہ خونریزی ہو۔
کراچی میں پریس کانفرنس کرتے ہوئے عامر خان کا مزید کہنا تھا کہ ہمیں کسی کا ڈر نہیں ہے، ہم نے چوڑیاں نہیں پہن رکھیں، کوئی یہ سمجھتا ہے کہ ہم مسلح جتھوں سے ڈر جائیں گے تو یہ ان کی بھول ہے، نئے لے پالک سندھو دیش کو آگے کرکے یہ سمجھ رہے ہیں کہ کراچی کی دیگر قومیتوں کو خوفزدہ کردیا جائے گا تو یہ ان کی بھول ہے، ہم آپ کے جرائم کو بے نقاب کرتے رہیں گے، آپ کے آگے ڈٹے رہیں گے۔
انہوں نے مزید کہا کہ ہم نے پندرہ جون کو سندھ حکومت کے خلاف احتجاجی ریلی کا فیصلہ کیا تھا جس سے مرعوب ہو کر سندھ حکومت نے جان بوجھ پر سندھو دیش کے حامیوں سے پندرہ جون کو ہی احتجاج کا اعلان کروایا، جن ملک دشمنوں کے سروں کو کچل دینا چاہئے پیپلز پارٹی ان ہی کی سرپرستی کررہی ہے اور شہر میں بدامنی کو ہوا دے کر ایم کیو ایم کو بدنام کرنے کی سازش کررہی ہے۔ لہذا ہم چند دنوں کیلئے ریلی کو ملتوی کررہے ہیں اور جلد ہی کراچی، حیدر آباد اور میرپور خاص میں تسلسل کے ساتھ ریلیاں ہوں گی جس سے جلد ہی آگاہ کردیا جائے گا۔
اس موقع پر ایم کیو ایم کے رہنماء ورکن سندھ اسمبلی خواجہ اظہار الحسن کا کہنا تھا کہ صوبائی وزیر تعلیم سعید غنی اور وزیر اعلیٰ سندھ مراد علی شاہ نے وفاق کیلئے جو زہر اگلا اور ان کے لب ولہجے سے علیحدگی پسند اور انتہا پسندی واضح نظر آرہی تھی اس کی ہم شدید ترین الفاظ میں مذمت کرتے ہیں۔ صوبہ سندھ کسی کے باپ کی جاگیر نہیں ہے،ہم بھی شہری سندھ کے بیٹے ہیں، ہماری اسمبلیوں پر پیپلز پارٹی نے ناجائز قبضہ کیا ہوا ہے،پیپلز پارٹی پی ایف سی کے حوالے سے اپنے منشور کی گزشتہ تیرہ سالوں سے خلاف ورزی کررہی ہے، کراچی پانی کی بوند بوند کو ترس رہا ہے، سازش کے تحت پانی چوری کروایا جارہا ہے، کے فور میں تاخیر پیپلز پارٹی کی وجہ سے ہے۔