Feb 25, 2021 01:59 pm
views : 252
Location : Domestic Place
Karachi- hometown Waziristan lacks sports opportunities, says Islamabad United's Emerging Cricketer Muhammad Waseem
کراچی، اسلام آباد یونائیٹڈ کے ایمرجنگ کرکٹر محمد وسیم جونیئرکاایچ بی ایل پی ایس ایل سکس میں نمایاں کارکردگی کا عزم
شمالی وزیرستان سے تعلق رکھنے والے آلراؤنڈر محمد وسیم جونیئر نےایچ بی ایل پی ایس ایل سکس میں اسلام آباد یونائیٹڈ کی نمائندگی سے قبل بہت محنت کی۔ انہوں نے دو ہزار گیارہ میں ٹیپ بال کرکٹ کا آغاز کیا اور پھر ہارڈ بال کرکٹ کھیلنے کے لیے پشاور منتقل ہوگئے۔
محمد وسیم کا کہنا ہے کہ شروع میں تو ان کے والد بھی ان کے کرکٹ کھیلنے پر خوش نہیں تھے مگر پھر چچا کی رہنمائی اور قریبی دوستوں کے تعاون نے انہیں آگے بڑھنے میں بہت مدد کی۔
نوجوان آلراؤنڈر جنوبی افریقہ میں کھیلے گئے آئی سی سی انڈرنائنٹین کرکٹ ورلڈ کپ دو ہزار بیس میں پاکستان کی نمائندگی کا اعزاز حاصل کرچکے ہیں۔ گذشتہ سال ایونٹ میں شرکت ایک یادگار تجربہ تھا اور وہ ٹورنامنٹ میں پاکستان انڈ نائنٹین کرکٹ ٹیم کی نمائندگی پر فخر محسوس کرتے ہیں۔
گذشتہ سال کھیلے گئے اس ایونٹ میں محمد وسیم جونیئر نے اسکاٹ لینڈ کے خلاف بہترین کارکردگی پیش کرتے ہوئے پانچ وکٹیں حاصل کی تھیں۔پاکستان انڈر نائنٹین کرکٹ ٹیم نے ٹورنامنٹ میں تیسری پوزیشن حاصل کی تھی۔
آئی سی سی انڈر نائنٹین کرکٹ ورلڈکپ دو ہزار بیس کے سیمی فائنل میں بھارت سے شکست پر اپنی مایوسی کا اظہار کرتے ہوئے نوجوان کرکٹر نے کہا کہ اس میچ میں ناکامی نے سب کو افسردہ کردیا تھامگر اب وقت آگے بڑھ چکا ہے۔
اسلام آباد یونائیٹڈ کے اسکواڈ میں شمولیت پر مسرور نوجوان آلراؤنڈر کاکہناہےکہ اسلام آباد یونائیٹڈ ایک بہترین فرنچائز ہےکہ جہاں ہمیں حسن علی اور کپتان شاداب خان جیسے ٹی ٹونٹی کرکٹ کے تجربہ کار کھلاڑیوں کا ساتھ میسر ہیں اور یہاں سب کھلاڑی ایک دوسرے کی مکمل رہنمائی کرتے ہیں۔