بغداد، عراق میں حکومت مخالف مظاہروں میں 30 افراد جاں بحق
http://www.tnnasia.tv
عراق میں معاشی بد حالی، بے روز گاری اور حکومتی بدعنوانیوں کے خلاف احتجاج کے دوران کم از کم 30 افراد جاں بحق اور سیکڑوں زخمی ہوگئے۔
بین الاقوامی میڈیا رپورٹس میں بتایا گیا ہے ابتر معاشی بدحالی کے خلاف 15 روز کے وقفے کے بعد احتجاج کا نیا سلسلہ شروع ہوگیا ہے، دارالحکومت بغداد سمیت ملک کے بڑے شہروں میں حکومت مخالف احتجاجی ریلیاں نکالی گئی ہیں۔
عراق میں انسانی حقوق کے مبصر ادارے کا کہنا ہے کہ پولیس نےاحتجاج کو طاقت کے ذریعے کچلنے کے لیے وحشیانہ کارروائیاں کی ہیں جس کے نتیجے میں کم ازکم 30 افراد اپنی جان سے ہاتھ دھو بیٹھے ہیں۔
مبصر ادارے کا کہنا ہے کہ دارالحکومت بغداد سمیت ملک کے بڑے شہروں میں ہونے والے مظاہروں میں ہزاروں افراد نے شرکت کی، پولیس نے مظاہرین کے خلاف طاقت بے دریغ استعمال کیا۔
عراق کے نیم سرکاری انسانی حقوق کمیشن کے مطابق حکومت مخالف مظاہروں میں پولیس سے جھڑپوں کے دوران اب تک 2 ہزار سے زائد افراد زخمی ہوچکے ہیں۔
واضح رہے کہ عراق میں بے روز گاری، ناقص عوامی سہولیات، غربت ، صاف پانی اور کرپشن سے تنگ آکر چند روز قبل شہریوں نے احتجاجی تحریک شروع کی تھی جس کے دوران 150 کے قریب افراد اپنی جان سے گئے تھے۔
حکومتی یقین دہانیوں کے بعد احتجاج چند دن کے لیے رک گیا تاہم تعطل کے بعد ایک بار پھر عوام سڑکوں پرنکل آئے ہیں۔