Aug 22, 2019 06:33 pm
views : 298
Location : Abdullah Shah Gahzi
Karachi- Abdullah Shah Ghazi's urs celebrations begin
کراچی: حضرت عبداللہ شاہ غازی کی 1289 ویں عرس کی تقریبات کا آغاز
معروف صوفی بزرگ حضرت عبداللہ شاہ غازی کے 1289 ویں عرس کی تقریبات کا آغاز ہوگیا ہے، صوبائی وزیر ناصر حسین شاہ اور سعیدغنی نے چادر چڑھائی اور فاتحہ خوانی کی، اس موقع پر سیکیورٹی کے سخت ترین انتظامات کئے گئے ہیں۔
تفصیلات کے مطابق معروف صوفی بزرگ حضرت عبداللہ شاہ غازی کے 1289 ویں عرس کی 3 روزہ تقریبات شروع ہوگئیں، عرس کی تقریبات کا آغاز رات گئے سے شروع ہوا، جب ان کے مزار ہزاروں من عرق گلاب صندل اور کستوری سے غسل دیا گیا۔
صبح کے وقت صوبائی وزیر ناصر حسین شاہ اور سعید غنی نے عبداللہ شاہ غازی کے مزار پر حاضری دیتے ہوئے چادر چڑھائی اور فاتحہ خوانی کر کے عرس کا باقاعدہ آغاز کیا۔
عبداللہ شاہ غازی کے 1289 واں عرس مبارک میں شرکت کیلئے ملک بھر سے زائرین کی آمد کا سلسلہ جاری ہے، انتظامیہ کی جانب سے عرس کے موقع پر سخت حفاظتی انتظامات کئے گئے ہیں، پولیس اور رینجرز کے جوان مختلف مقامات پر تعینات ہیں، جو تین مختلف مراحل میں زائرئن کی تلاشی لینے پر مامور ہیں۔
مزار کے دونوں اطراف ٹرانسپورٹ کو بند کر دیا گیا ہے اور زائرین کو پیدل مزار پر جانے کی اجازت ہو گی جبکہ زائرین کی سہولت کیلئے دودھ شربت اور پانی کی سبیلیں بھی لگا دی گئیں اورمحکمہ اوقاف کی جانب سے میڈیکل کیمپ بھی لگایا گیا ہے۔
عبداللہ شاہ غازی کے عرس کے دوران مزار پر لنگر کا اہتمام کیا جاتا ہے، مزار کے اندرونی حصے میں ثناء خوانی، فاتحہ خوانی اور قصیدہ پڑھنے کا سلسلہ جاری رہتا ہے۔ عرس کی تقریبات بائیس سے چوبیس اگست تک جاری رہیں گی۔چوبیس اگست کواختتامی تقریب وزیراعلیٰ سندھ سید مراد علی شاہ چادرپوشی سے کریں گے۔