Jul 10, 2019 06:01 pm
views : 265
Location : Different Places
Karachi- News anchor killed by a Freind
کراچی،کاروباری جھگڑا ،نیوز اینکر قتل
ڈیفنس کے علاقے خیابان بخاری میں گزشتہ روز نجی ٹی وی کے اینکر مرید عباس اور ان کے دوست خضر حیات کو قتل کردیا گیاتھا جس سے متعلق سی سی ٹی وی ویڈیو منظر عام پر آگئی ہے۔
ویڈیو میں ملزم عاطف زمان کو اسلحہ کے ساتھ جبکہ کئی لوگوں کو عمارت سے باہر بھاگتے دیکھا جاسکتا ہے۔
پولیس کا کہنا ہے کہ مقتول مرید عباس کاروباری جھگڑے کا نشانہ بنے ہیں، ملزم عاطف زمان نے انہیں دفتر بلا کر اُن پر گولیاں برسا دیں، ملزم نے بعد میں اپنے فلیٹ پر پہنچ کر خود کو بھی گولی مارلی۔
جاں بحق اینکر مرید عباس کی اہلیہ زارا عباس کا اپنے ویڈیو بیان میں کہنا ہے کہ مبینہ قاتل عاطف زمان، مرید عباس کا بزنس پارٹنر تھا۔ ان کے شوہر نے عاطف زمان کے کاروبار میں 50لاکھ روپے کی سرمایہ کاری کر رکھی تھی۔ وہ ملزم سےکئی مرتبہ اپنے پیسے واپس کرنے کا کہہ چکے تھے۔
زارا عباس نے مزید کہا کہ مرید عباس نے 8بجے کے بعداُنہیں فون کرکے بتایا تھا کہ عاطف زمان نےاُن کو پیسے دینے کے لیے بلایا ہے۔ ملزم نے مرید عباس کو پیسے دینے کے بہانے بلایا اور اُن پر گولیوں کی برسات کردی۔
پوسٹ مارٹم رپورٹ کے مطابق مقتول کو 4 گولیاں ماری گئیں جو کہ سینے، کمر اور ہاتھ پر لگیں جبکہ ڈاکٹر کا کہنا ہے کہ مرید عباس کی موت سینے پر گولیاں لگنے سے ہوئی۔
ایس ایس پی ساوتھ انویسٹی گیشن طارق دھاریجو کے مطابق واقعے کے کچھ ہی دیر بعد عاطف زمان نامی شخص نے نشاط کمرشل میں واقع اپنے فلیٹ میں خود کو گولی مارلی۔
نیوز اینکر کے قتل پر ڈی جی آئی ایس پی آر اور سیاسی رہنماؤں کی جانب سے افسوس کا اظہار کیا گیا ہے۔