جعلی اکاؤنٹس کیس، آصف زرداری کے جسمانی ریمانڈ میں 11 روزہ توسیع
سابق صدر آصف زرداری کا جعلی بینک اکاؤنٹس کیس میں لیا گیا 11 روزہ جسمانی ریمانڈ مکمل ہو گیا، سابق صدر کو نیب ٹیم نے آج احتساب عدالت پیش کیا اور مزید 11 روزہ ریمانڈ کی استدعا کی جسے عدالت نے منظور کر لیا۔ آصف زرداری کو مزید تحقیقات کے بعد 2 جولائی کو دوبارہ عدالت پیش کیا جائے گا۔
کیس کی سماعت احتساب عدالت کے جج محمد ارشد ملک نے کی۔ نیب کی جانب سے جب عدالت میں 14 روزہ ریمانڈ کی درخواست کی گئی تو آصف زرداری کے وکیل لطیف کھوسہ نے سوال اٹھایا کہ نیب 14،14 دن کا جسمانی ریمانڈ کیوں مانگ رہا ہے۔ آصف زرداری نے اس موقع پر کہا کہ نیب کو ایک ہی مرتبہ 90روز کا ریمانڈ دے دیں۔
آصف زرداری کو ضمانت مسترد ہونے پر 10 جون کو گرفتار کیا گیا تھا ،احتساب عدالت نے آصف زرداری کو11 جون کو 10 روزہ جسمانی ریمانڈ پر نیب کے حوالے کیا تھا۔ آصف زرداری پر جعلی بینک اکاؤنٹس کے ذریعے اربوں روپے کے منی لانڈرنگ کا الزام ہے۔