راولپنڈ ی ،آرمی چیف کی جانب سے قومی ٹیم کے اعزاز میں استقبالیہ،آئی ایس پی آر
چیمپئنز ٹرافی کی فاتح پاکستان کرکٹ ٹیم کے اعزاز میں آرمی چیف جنرل قمر جاوید باجوہ کی جانب سے تقریب کا انعقاد کیا گیا۔
پاک فوج کے شعبہ تعلقات عامہ (آئی ایس پی آر) کے مطابق پاکستان کرکٹ ٹیم کے
اعزاز میں آرمی چیف جنرل قمر جاوید باجوہ کی میزبانی میں استقبالیہ تقریب
آرمی ہاؤس میں سجائی گئی جس میں قومی ٹیم کے کپتان سرفراز احمد ٹرافی کے
ہمراہ شریک ہوئے، دیگر پلیئرز اور آفیشلز کے علاوہ چیرمین پی سی بی شہریار
خان بھی موجود تھے، چیمپئنز ٹرافی کے فائنل میں بھارت کو شکست فاش دینے
والی قومی ٹیم کو آرمی چیف نے مبارکباد دیتے ہوئے عمرہ پر بھیجنے کا اعلان
کیا تھا۔
آئی ایس پی آر کی جانب سے جاری بیان کے مطابق آرمی چیف جنرل قمر جاوید
باجوہ نے کھلاڑیوں کی تقریب پذیرائی سے خطاب کرتے ہوئے چیمپیئنز ٹرافی میں
قومی کرکٹ ٹیم کی شاندار کارکردگی کو سراہا اور کہا کہ اس کی بدولت طویل
عرصے بعد پوری قوم کو جشن منانے کا موقع میسر آیا۔
آرمی چیف نے کھلاڑیوں کو مخاطب کرتے ہوئے انہیں سخت محنت جاری رکھنے،
عاجزی اختیارکرنے اور راستباز رہنے کی تلقین کی کیوں کہ وہ پاکستان کے سفیر
ہیں۔ اس موقع پر چیئرمین پاکستان کرکٹ بورڈ شہریار خان نے پاکستان میں
کرکٹ واپس لانے میں بھرپور تعاون کرنے پر آرمی چیف جنرل قمر جاوید باجوہ
کا شکریہ بھی ادا کیا۔
پی سی بی ایگزیکٹو کمیٹی کے چیئرمین نجم سیٹھی نے پاکستان سپر لیگ کے فائنل
کے لاہور میں انعقاد میں بھرپور تعاون کرنے پر آرمی چیف کا شکریہ ادا
کیا۔
علاوہ ازیں تقریب میں شریک قومی کرکٹ ٹیم کے کھلاڑیوں نے بھی اپنی پذیرائی
پر آرمی چیف کا شکریہ ادا کیا جبکہ انہوں نے دہشت گردی کے خلاف جنگ اور
پاکستان کو محفوظ بنانے میں پاک فوج کے کردار اور قربانیوں کو سراہا۔