لندن،اسلام آباد اس وقت جادو ٹونے کی گرفت میں ہے،شہباز شریف
سابق وزیراعظم نوازشریف سے پاکستان سے لندن پہنچے والے مسلم لیگ (ن) کے رہنماؤں نے ملاقات کی۔
مسلم لیگ (ن) کے قائد نواز شریف لندن میں علاج کی غرض سے 19 نومبر سے موجود ہیں جہاں اب تک ان کا متعدد بار طبی معائنہ کیا گیا ہے۔
ن لیگ کے اعلیٰ سطح کے وفد نے لندن میں علاج کے لیے مقیم پارٹی قائد نواز شریف سے ملاقات کی، یہ ملاقات ایون فیلڈ اپارٹمنٹ میں ہوئی۔
ملاقات میں ن لیگ کی سیاسی حکمت عملی پر مشاورت کی گئی۔
سابق وزیراعظم سے ملاقات سے قبل لیگی رہنماؤں نے ظہرانے پر اپوزیشن لیڈر شہباز شریف سے بھی ملاقات کی، اِن ملاقاتوں میں سابق وزیرخزانہ اسحاق ڈار اور سینیٹر پرویز رشید بھی موجود تھے۔
مسلم لیگ ن کے صدر شہباز شریف نے میڈیا سے بات کرتے ہوئے کہا کہ وزیر اعظم عمران خان کا تجربہ انتہائی مایوس کن ہے جبکہ اسلام آباد اس وقت جادو ٹونے کی گرفت میں ہے۔
سابق وزیر اعظم نواز شریف کی صحت سے متعلق شہباز شریف نے کہا کہ میں نے نواز شریف کی خیریت دریافت کی ہے اور ان کے معالج ڈاکٹر عدنان سے بھی بات ہوئی ہے جنہوں ںے صحت کے بارے میں آگاہ کیا۔
انہوں نے کہا کہ نواز شریف کی صحت کو برقرار رکھنے کے لیے انہیں ادویات دی جا رہی ہیں۔ اُن کی صحت بہتر نہیں ہو رہی ہے اور علاج کی غرض سے امریکہ لے جانا پڑے گا۔
میڈیا سے گفتگو میں خواجہ آصف کا کہنا تھا کہ دوبارہ الیکشن سے پہلے ان ہاؤس تبدیلی ضروری ہے، گزشتہ چند ہفتوں میں جو معاملات چلے ہیں ان پر شہباز شریف سے ہدایات لے لی ہیں۔
مسلم لیگ (ن) کے صدر شہباز شریف نواز شریف کے ہمراہ لندن میں موجود ہیں جہاں انہوں نے پارٹی کا اعلیٰ سطح کا اجلاس طلب کیا تھا جس میں شرکت کے لیے احسن اقبال، خواجہ آصف، امیر مقام، خرم دستگیر، پرویز رشید سمیت دیگر رہنما پاکستان سے لندن پہنچے ہیں۔