Sep 22, 2018 10:48 am
views : 509
Location : Domestic Place
Islamabad- India calls off foreign ministers meeting with Pakistan at UNGA
اسلام آباد، بھارت کی ہٹ دھرمی، پاکستانی وزیر خارجہ سے ملاقات طے کرکے مُکرگیا
بھارت نے پاک بھارت وزرائے خارجہ کے درمیان نیو یارک میں ہونے والی ملاقات منسوخ کر دی ہے۔ شاہ محمود قریشی اور سشما سوراج کی ملاقات 27 ستمبر کو نیویارک میں ہونی تھی تاہم اب بھارت کی جانب سے جنرل اسمبلی اجلاس کی سائیڈ لائنز پر پاکستانی وفد سے ملاقات سے انکار کردیا گیا ہے۔
بھارتی میڈیا کے مطابق وزارتِ خارجہ کی جانب سے ملاقات منسوخ کرنے کی وجہ مقبوضہ کشمیر کی حالیہ صورتحال بتائی گئی ہے۔
بھارتی روئیے پر وزیر خارجہ شاہ محمود قریشی بولے پاکستان کو خطے میں امن و استحکام اور بھارت کو سیاست کی فکر ہے۔ ملاقات سے انکار پر حیران ہوں اور تعجب بھی ہوا، لگتا ہے بھارت میں گھبراہٹ کی لہر پیدا ہوئی ہے، اور ملاقات سے پہلے ہی بھارت کے قدم ڈگمگا گئے ہیں۔
شاہ محمود قریشی کا مزید کہنا تھا کہ کسی بھی مسئلے کا حل مذاکرات سے ہی نکل سکتا ہے، دہائیوں سے الجھے مسائل کو سلجھانے کی ضرورت ہے، پاکستان نے بھارت کو ہر بار مذاکرات کی پیشکش کی لیکن افسوس ہے بھارت کی جانب سے کبھی مثبت جواب نہیں دیا گیا اور ایک بار پھر بھارت کی جانب سے ہچکچاہٹ کا مظاہرہ کیا گیا۔
انہوں نے کہا کہ ایسے بہت سے ثبوت ہیں جو مذاکرات میں بھارت کی جانب سے مداخلت کر رہے ہیں، بھارت کی سیاست تقسیم دکھائی دے رہی ہے اور لگتا ہے بھارت میں اگلے انتخابات کی تیاری ہورہی ہے ۔
واضح رہے کہ گزشتہ روز وزیراعظم عمران خان نے بھارتی وزیراعظم نریندرا مودی کے خط کا جواب دیتے ہوئے دونوں ممالک کے درمیان مذاکرات کی ضرورت پر زوردیا تھا جس پر بھارت نے مذاکرات کی ہامی بھرتے ہوئے پاک بھارت وزرائے خارجہ کے درمیان 27 ستمبر کو نیویارک میں ملاقات کی تصدیق کردی تھی۔