div align="right">پاکستان پیپلزپارٹی کے شریک چیرمین آصف علی زرداری آج ڈیڑھ سال بعد وطن
واپس پہنچیں گے جہاں ان کا طیارہ کراچی ایئرپورٹ پر لینڈ کرے گا۔
پاكستان پیپلز پارٹی نے سابق صدر اور شریک چیرمین آصف علی زرداری كی
واپسی پر شاندار استقبال كی تیاریاں مكمل كرلی ہیں، آصف زرداری کی وطن
واپسی پر کراچی شہر میں انہیں خوش آمدید کہنے کے لیے بینرز آویزاں کیے
گئے ہیں، پیپلزپارٹی کی جانب سے مختلف علاقوں میں کیمپ لگائے گئے ہیں جہاں
کارکنان کا رش ہے، کارکنان اپنے رہنما کی وطن واپسی پر خوشی سے سرشار ہیں،
استقبالیہ کیمپوں میں کارکنان نے رات گئے پارٹی ترانوں پر رقص اور خوب ہلہ
گلہ کیا۔ کراچی میں آصف زرداری کی وطن واپسی کے موقع پر اونٹوں اور بکروں
کا صدقہ بھی دیا گیا۔
آصف زرداری کے ہمراہ ان کے صاحبزادے اور پیپلزپارٹی کے چیرمین بلاول بھٹو
بھی ہوں گے جب کہ اپنے رہنماؤں کا وزیراعلیٰ سندھ مراد علی شاہ، سابق
وزیراعظم یوسف رضا گیلانی، سابق وزیراعلیٰ سندھ قائم علی شاہ اور شیری رحمان
سمیت دیگر پارٹی رہنما ایئرپورٹ پر استقبال کریں گے، آصف زرداری کی وطن
واپسی کے موقع پر پیپلزپارٹی کراچی ایئرپورٹ کے اولڈ جناح ٹرمینل پر جلسہ
کرے گی، اولڈ ٹرمینل پر کوئی اسٹیج نہیں بنایا جائے گا بلکہ سابق صدر بلٹ
پروف ٹرک پر کارکنان سے خطاب کریں گے۔
آصف زرداری ایئرپورٹ سے بلاول ہاؤس بذریعہ ہیلی کاپٹر یا شارع فیصل سے
جائیں گے اس بات کو پیپلزپارٹی کی جانب سے خفیہ رکھا جارہا ہے۔ آصف زرداری
بلاول ہاؤس پہنچنے کے بعد پارٹی رہنماؤں کے اجلاس کی بھی صدارت کریں گے۔
آصف زرداری 24 دسمبر کو پارٹی کے ارکان اسمبلی سے ملاقات کریں گے اور 26
دسمبر کو لاڑکانہ روانہ ہوں گے جہاں وہ 27 دسمبر کو ان کی اہلیہ اور سابق
وزیراعظم شہید بے نظیر بھٹو کی برسی کی تقریب سے خطاب کریں گے۔