Nov 15, 2016 03:51 pm
views : 1006
Location : Prime Minister House
Islamabad- PM Nawaz Sharif chairs High Level Meeting
اسلام آباد،وزیراعظم نواز شریف کی زیرصدارت اعلی سطح کا اجلاس
وزیراعظم نواز شریف کا کہنا ہے کہ پاکستان بھارتی جارحیت پر انتہائی
صبروتحمل کا مظاہرہ کر رہا ہے تاہم ہمارے صبر کو کمزوری نہ سمجھا جائے۔
وزیراعظم نوازشریف کی زیر صدارت کنٹرول لائن کی صورتحال پرجائزہ اجلاس ہوا
جس میں مشیر خارجہ امور سرتاج عزیز، مشیر قومی سلامتی لیفٹیننٹ جنرل
ریٹائرڈ ناصر جنجوعہ اور طارق فاطمی سمیت دیگر اعلیٰ حکام نے شرکت کی۔
اجلاس میں مشیر خارجہ امور سرتاج عزیز نے ایل او سی کی صورتحال پر بریفنگ
اور بھمبر میں 7 پاکستانی فوجیو ں کی شہادت پر حکومتی ردعمل سے متعلق شرکا ء
کو آگاہ کیا۔
اجلاس کے دوران وزیراعظم نواز شریف نے کہا کہ پاکستان بھارتی جارحیت پر
انتہائی صبروتحمل کا مظاہر کر رہا ہے تاہم ہمارے صبر کو کمزوری نہ سمجھا
جائے، پاکستان کسی بھی جارحیت کی صورت میں دفاع کی صلاحیت رکھتا ہے۔ ہماری
فوج پہل نہیں جوابی کارروائی کرتی ہے جب کہ بھارت کی جانب سے ایل او سی پر
کشیدگی میں اضافہ علاقائی امن و سلامتی کیلئے خطرہ ہے اور یہ مقبوضہ کشمیر
میں بھارتی مظالم سے توجہ ہٹانے کی کوشش ہے لہذا اقوام متحدہ کنٹرول لائن
پر سیز فائر کی خلاف ورزی کا نوٹس لے۔
وزیراعظم نواز شریف نے کہا کہ پاکستان اور امریکا میں سات دہائیوں سے
تزویراتی شراکت داری قائم ہے لہذا پاکستان علاقائی امن واستحکام کے لیے نئی
امریکی حکومت سے مل کر کام کرے گا۔